Əhmədli Nurlan Rəhim oğlu

Nurlan Əhmədli 12 oktyabr 1996-cı ildə Oğuz rayon Xaçmaz kəndində anadan olmuşdur. 2003-2014-cü illərdə Xaçmaz kəndindəki M. F. Axundov adına 1 nömrəli tam orta məktəbdə təhsil almışdır. Məktəbi bitirdikdən sonra Azərbaycan Texniki Universitetinin radiotexnika mühəndisliyi ixtisasına qəbul olunmuş, 2018-ci ildə təhsilini başa vurmuşdur.

N.Əhmədli 2018-2019-cu illərdə ordu sıralarında əsgəri xidmət keçmişdir.

2020-ci ilin sentyabrında başlanan Vətən müharibəsi ilə əlaqədar olaraq elan olunmuş qismən səfərbərliklə döyüş bölgəsinə göndərilmişdir. Füzuli döyüşlərinin birində şəhidlik zirvəsinə yüksələn Nurlan Əhmədli 27 oktyabr 2020-ci ildə Xaçmaz kəndindəki Şəhidlər xiyabanında dəfn edilmişdir.

Azərbaycan Respublikasının Prezidenti İlham Əliyevin 15 dekabr 2020-ci il tarixli Sərəncamı ilə Nurlan Əhmədli “Vətən uğrunda”, 25 dekabr 2020-ci il tarixli Sərəncamı ilə "Füzulinin azad olunmasına görə" medalları ilə təltif olunmuşdur.