Nuralıyev Elşən Rövşən oğlu

Sincan kəndində anadan olmuşdur. 2006-cı ildə şəhid Əsabəli Abdulhüseynov adına Sincan kənd tam orta məktəbin birinci sinfinə getmiş, 2017-ci ildə həmin məktəbi bitirmişdir. Məktəbi bitirdikdən sonra təsərrüfatda müxtəlif işlərdə işləyərək ailəsinə kömək etmişdir. 2019-cu ilin aprelində hərbi xidmətə göndərilmişdir. Hərbi xidmətdə fərqləndiyinə görə məzuniyyətə buraxılmışdır. Bu ailəsinin Elşənlə son görüşü olmuşdur. Hərbi xidmətinin başa çatmasına 5 gün qalmış Vətən müharibəsi başlamış və tankçı kimi 29 sentyabrda Goranboy, Ağcabədi, Füzuli istiqamətinə aparılmışdır. Tez-tez evə zəng edib deyirmiş ki, təlimdəyəm, yaxşıyam, anama deyin narahat olmasın. Amma əslində o ən qızğın döyüş yerlərində iştirak edirdi. Füzuli uğrunda gedən döyüşlərin birində düşmən snayperindən açılan atəşlə Elşən Nuralıyev şəhidlik zirvəsinə yüksəlmişdir.

Şəhid Elşən Nuralıyev oktyabrın 12-də Sincan kəndində torpağa tapşırılmışdır.

Azərbaycan Respublikasının Prezidenti İlham Əliyevin 15 dekabr 2020-ci il tarixli Sərəncamı ilə Elşən Nuralıyev “Vətən uğrunda”, 25 dekabr 2020-ci il tarixli Sərəncamı ilə "Füzulinin azad olunmasına görə" medalları ilə təltif olunmuşdur.